ನೀನಿರದೇ

ಎಷ್ಟು ದೂರ ಹೋದರೇನು ?

ನಿನ್ನಲ್ಲಿಯೇ ಅಡಗಿ ಕೂತಿರುವ ಚೋರ ನಾನು 

ಎಷ್ಟು ಕೋಪದಿಂದ ಉರಿದರೇನು ?

ನಿನ್ನಲ್ಲಿಯೇ ಬೆಣ್ಣೆಯಂತೆ ಕರಗುವೆ ನಾನು 

ಎಷ್ಟು ಮಾತು ಬಿಟ್ಟರೇನು ?

ನಿನ್ನೆದೆಯ ಪಿಸುಮಾತನ್ನು ಸದಾ ಕದ್ದಾಲಿಸುವ ಖದೀಮ ನಾನು 

ಎಷ್ಟು ಉಗಿದರೇನು ?

ನಿನ್ನೆಲ್ಲಾ ಬೈಗುಳಗಳಿಂದ ಪುಷ್ಪಾರ್ಚನೆ ಮಾಡಿಸಿಕೊಂಡ ದೇವರಿನಂತೆ ನಾನು 

ಎಷ್ಟು ಶಿಕ್ಷೆ ಕೊಟ್ಟರೇನು ?

ನಿನ್ನೆಲ್ಲಾ ದಂಡನೆಯನ್ನು ಹಿಗ್ಗಿನಿಂದ ಅನುಭವಿಸುವ, ನಿನ್ನಯ ಸನ್ನಡತೆಯ ಖೈದಿ ನಾನು 

ಎಷ್ಟು ಜನರಿದ್ದರೇನು ಲೋಕದಲಿ ?

ನೀನಿರದೇ ಜಗವೆಲ್ಲಾ ಖಾಲಿಯಾದ ತೆಂಗಿನ ಚಿಪ್ಪಿನಂತೆ ಎನಗೆ 

ಎಷ್ಟು ಧೈರ್ಯವಿದ್ದರೇನು  ?

ನೀನಿರದೇ "ಈ ಜೀವನ ಸಾಕು" ಎನಿಸಿ ಧೃತಿಗೆಡುವ ಮುಂಚೆ, ಮತ್ತೆ ಬಂದು ಮೊಕದ್ದಮೆ ಹೂಡು.

ಇಂತಿ,

ನಿನ್ನಯ ವಿಚಾರಣಾಧೀನ ಖೈದಿ